初中時熱愛長跑的劉小麗憶起老師的教誨，當跑累了就停下腳步，「慢慢行，行十步就一定要再跑番。我一直記住，如果唔係，意志未必堅持到」。從大學走進社區，再進入議會，繼而被DQ、追討薪津，再重返街頭，籌集訟費上訴，過去一年她可能經歷了別人一生的政治生涯，「我話畀自己聽，再攰嘅時候，就係對方要你放棄，所以我更加要堅持」。

記者 王家文

剛過去的秋天劉小麗織了數十條頸巾，為長者送暖，也為自癒，「一針一針，織番自己嘅信心出嚟」。自諾貝爾和平獎得主劉曉波今年7月病逝，劉霞遭軟禁，任由擺佈，她的信心逐漸崩潰，「嗰一刻開始好沉重」；未幾被褫奪議席，再到東北十三子和雙學三子判囚，「戰友入獄，不合理嘅刑期，令我好心傷」。

她選擇停下腳步，「好多人叫我放棄」，離開政治圈，甚至移民，「面對困難，有人選擇擰轉面。但如果每個人都係咁，社會形勢惡化只會更加快」。離開議會，她重返街頭搞論壇，繼續跟進墟市政策，關注安老和勞工議題，「先發覺我哋冇乜嘢輸，咪由基本步開始做起」，直視困難，走出灰暗，「我覺得再壞，也不過如此」。

惟過去一年，劉小麗以「不孝」形容自己，「實在畀得太少時間爸爸，一年都冇同佢食過幾次飯，對佢唔住」。曾說過眼淚會令人堅強的她，深呼吸後才說下去，「媽媽過身後，我同自己講要畀多啲時間爸爸，但結果全副時間投入社會工作」。父親看新聞才知道女兒被追討薪津、上訴宣誓案，「老人家係擔心，唔希望行得太前，佢能夠畀空間我，已經係好大尊重」。

出身貧窮，劉小麗自幼不敢奢望夢想，「覺得賺錢養到父母已經滿足」，升上中學漸見社會荒唐，只追名逐利，「開始諗做人為乜」；長大後任職大專講師，生活穩定但坐立不安，「當你發現外面社會已經分崩離析，仍留喺學校講理想，對住下一代講希望，覺得似喺象牙塔講風涼話」。2014年，她先後組織「青年重奪未來」及「小麗民主教室」，給自己10年時間投入社會運動。

訪問翌日，在11名泛民議員被逐下，立法會強行通過修改《議事規則》。由大學走上街頭，涉足議會，再被DQ，今天已走了三分一時間，劉小麗堅持能創造未來，承如作家魯迅在散文《希望》中引述匈牙利詩人裴多菲的詩，「絕望之為虛妄，正與希望相同」，「如果你只係希望，好快變成絕望，我哋係要創造、實踐希望」。

【minigame】2017瘋暈人物 返工打機唔使擇日
http://bit.ly/2CeWQkP