港台製作嘅《傑出華人系列──李嘉誠》噚晚喺電視重播，查實剛剛出版，由超人做老闆嘅台灣《商業周刊》亦同李超人做咗訪問，講佢嘅經商之道。之前超人講過，佢嘅成功秘訣係「好謀而成、分段治事、不疾而速、無為而治」，但當時冇乜解釋；反而呢個訪問爆咗佢當年幾次重大收購，點樣體現呢十六字真言。
先講1977年佢迅雷不及掩耳買咗希爾頓酒店，超人話有一日佢去酒會，後面有兩個鬼佬傾偈，話中區有間酒店要賣，另一個人問賣家響邊度，個鬼佬答話響Texas（美國德州）。超人聽到，估到佢哋講緊希爾頓，於是即刻打電話畀長實（001）一個做核數嘅董事，對方同賣家嘅核數師係好朋友，於是酒會未完，超人已經坐喺賣方核數師嘅辦公室度，賣家核數師好奇怪咁問超人，點解咁快收到風？佢哋兩個鐘前先決定賣……超人呢個經驗演繹咗乜嘢叫做「不疾而速」，仲有去ball唔好掛住睇女仔，豎起隻耳仔收風，執到金都冇人知！

私己錢足先可話事

講到「好謀而成」，超人收購和記黃埔（013）同埋赫斯基石油，都充份發揮呢點。
先講赫斯基，超人響得到95%股權後，即通知赫斯基所有貸款銀行，要求佢哋如果想繼續同赫斯基往來，就要減手續費同利息，如果唔同意，佢可以用私人資金喺48小時內將債務還清，結果所有銀行都減息減費。呢一招教大家，最緊要留多啲私己錢，分分鐘反客為主！
至於買和黃，雖然滙豐（005）賣咗兩成多和黃股權畀佢，但消息一公佈，超人都即刻喺街狂掃和黃，令持股量一路上到三成多四成，咪唔會俾人挑戰佢嘅控制權。
超人話，佢用90%時間先諗失敗，所以長實創辦57年嚟，從未有一年虧損。又話審慎係一種藝術，但唔係停滯不前嘅借口；做人嘛，最好令你嘅敵人都相信你，同埋唔好得罪人……總之，就算你唔認同超人，睇完之後至少都知道成功非僥倖！

買希爾頓酒店快夾狠

講番超人買希爾頓酒店單刁，可以話係華資公司挑戰英資財團嘅先河。話說超人喺77年，用2.3億銀收購咗持有希爾頓酒店嘅永高公司，交易前後唔使一個禮拜就搞掂，貫徹李超人快夾狠嘅投資作風！
90年代，中區希爾頓酒店重建，成為今時今日嘅長江集團中心，李超人旗艦嘅總部。不過，華華仲記得喺77年，長實仲有單大刁，就係擊敗置地，成功奪得中環同金鐘嘅地鐵上蓋物業發展權。
呢兩件事正反映超人做生意嘅心得：「審慎，只能在適當時間、迅速做出決定，而非議而不決、停滯不前的藉口。」而佢有今日嘅成就，亦因做到「仁慈的獅子」，「仁慈是本性，但單單仁慈，業務不能成功......如果人家欺負到你頭上，你不能畏縮，要有能力反抗。」

超人：唔想港人誤解

噚晚港台重播嘅《傑出華人系列──李嘉誠》唔係完全舊嘢，其實中間加插咗啲最新嘅訪問，就係問超人對港大醫學院嘅命名風波點睇，同埋佢第三個仔。
人怕出名豬怕肥，超人捐錢畀港大，港大諗住將醫學院命名做「香港大學李嘉誠醫學院」，點知引嚟好多校友同社會人士反對，不過超人喺訪問度話，命名係好事，可以吸引啲人捐多啲錢，又話呢件係好小事，一啲都冇嬲。唉，佢一開始就講，捐10億咁大筆錢畀港大，就係唔想港人誤解佢，以為佢只會做生意，錢就捐去大陸，唔捐畀香港人……點知越搞越多風波，但佢一於少理，話社會日後自然會明白咁話。
提到佢第三個仔，超人早兩年話過，會將三分一身家捐畀李嘉誠基金會，佢好坦白咁講，「將啲積蓄畀晒完全唔識嘅人（指捐錢），呢個決唔容易。」不過，「呢個仔做人做事都幾好，咁分一份財產畀佢發揮都係好嘅。」

三幅字畫表心迹

《商業周刊》個訪問係響超人總部長江集團中心70樓頂樓進行，大家都好奇超人總部係點，結果係簡單得難以置信，冇獎盃獎座，冇文件相片，冇音響冇電視，連一本襯托學識嘅書都冇。只有兩部電腦同六部電話。不過就掛咗3幅超人親自揀嘅真迹字畫，不經意咁流露咗超人嘅內心世界。
第一幅係張大千嘅「李白詩意」，題字來自《山中答問》：「問予何事棲碧山，笑而不答心自閒，桃花流水沓然去，別有天地非人間」，超人話：「這代表心境很寬」。
第二幅係清初八大山人畫作，超人話八大山人嘅畫一般都係唔開心，惟有呢一幅係開心、自在，單係呢點就值得掛響辦公室。
第三幅係清末名將左宗棠嘅書法：「發上等願，結中等緣，享下等福；擇高處立，尋平處往，向寬處行」。超人話「發上等願」、「擇高處立」，佢好多年前就做到，但要做到後面幾句就唔易。

電郵地址：mailto:[email protected]