今屆港姐就完滿結束啦，結果由大熱嘅17號陳凱琳勝出，而事前都係大熱嘅劉溫馨，最後就得梗頸四，得23.06分，同季軍6號劉佩玥嘅27.52其實唔係差好遠。

喺後台訪問劉溫馨，問佢會唔會好失望?佢話:「唔會，亦都唔後悔，滿意自己表現。」不過分數只係差少少，會唔會覺得唔抵?劉溫馨話:「其實係覺得感動，大家都表現好好，呢啲嘢好難講，只係focus喺自己身上。」問佢會唔會覺得自己比6號優勝?佢就話總之滿意自己表現，唔想同人比較，人永遠都有進步空間。