噚日七一，足球界就冇搞大型比賽慶回歸，只有個別地區辦啲小型賽事，其中灣仔就繼續喺修頓足球場主辦「七一回歸盃足球邀請賽」呢個元老賽助興，今年邀請咗馬天尼、南華元老、愉園80同中尖。愉園有劉榮業同鍾楚維助陣，可惜三場輸晒包尾，而馬天尼就全勝封王。

再拍劉榮業組高矮鋒線

南華同愉園呢兩隊元老賽常客今次都幾重視個盃。南華有「偉哥」黃文偉同「平哥」陳鴻平兩位六、七十年代球星領軍，仲搵埋前港腳中堅賴羅球。愉園有劉榮業同鍾楚維壓陣，喺柬埔寨做生意嘅劉榮業，近年都會踢衞生波，不過退咗休嘅「大隻維」最多只做觀眾，可能咁耐冇落場有啲腳痕啦，噚日就戴住眼鏡落場；呢個港足高矮前鋒組合難得再現，可惜球迷唔多吖。
南華喺最後一場循環賽，憑後備落場嘅賴羅球建功，贏愉園1:0，以勝和負各一嘅成績壓倒中尖攞第二。72歲嘅「偉哥」亦有落場，佢話輸贏冇所謂，最緊要一班元老有機會聚舊，踢完波食餐飯就最開心喇。
有睇開本地波嘅球迷，可能對馬天尼有啲印象，其實馬天尼喺八十年代尾至九十年代初短暫踢過港甲，班主孫敬安仲做過港足領隊，不過隊波好快就淡出球圈，近年只活躍喺小型足球界。今次佢哋搵咗陳志光同譚亞福等前港腳助陣，最後三戰全勝稱王；有太太盧敏儀捧場嘅孫敬安都有落場踢兩腳㗎。