由Netflix原創嘅喜劇《小鎮滋味》（Santa Clarita Diet)第二季即將上架，兩位主角杜莉芭里摩亞（Drew Barrymore）及添姆菲奧芬（Timothy Olyphant）專程去到泰國曼谷宣傳劇集，二人噚晚於曼谷著名商場Siam Paragon參與紅地毯見粉絲。

兩位巨星到場前，先有十幾位身穿80年代舞衣嘅舞蹈員跳舞，老實講有少少九唔搭八，不過好快兩位主角就出場，引發現場粉絲尖叫。佢哋先為粉絲簽名自拍，再走到台上同大家打招呼。

杜莉一嚟就話自己好開心，因為一直都好鍾意食泰國菜，剛剛先食咗人生最豐富嘅午餐，仲話唔知返到美國無得食點算！之後講到套劇，添姆話二人有好微妙嘅化學作用，仲即刻同杜莉擊掌。當然佢再賣花讚花香，話劇集係史上最正嘅劇集，因為佢哋有杜莉，係其他劇揾唔到！

二人又透露今季會比上季更好睇、更大規模，二人唔單止要落力挽救婚姻，仲要拯救世界！總之就有好多瘋狂嘅事發生。杜莉話:「呢個故事係關於家庭同埋愛，當中有好多甜蜜嘅片段，可以令你離開生活壓力，盡情娛樂。」

最後大會就安排兩個身穿傳統泰國服飾嘅小妹妹上台獻花，兩位主角都非常高興。杜莉於同大家講再見之後，更再次走回台中感謝大家，指自己成世人都好想嚟泰國，仲祝大家一生都開心快樂，非常之親切！

精選娛聞，喺晒《娛果》
http://fb.com/appledailyent