當年今日

青心直說:沉澱的藍籌寶藏 - 胡孟青

蘋果日報 2010/01/05 00:00


大市焦點不約而同集中和記黃埔(013)同中國移動(941),大行估大市要上到兩萬六目標,對呢一對超級大落後孖寶充滿期待。提起和黃,都會即時想起拖低整體營運表現嘅3電訊業務,不過從近月超人以至霍大班身體力行密密增持嘅行動可見,管理層都幾看好業績,趕喺Black-out之前盡快入貨。看好嘅箇中原因,作為散戶只有靠估,橫掂「有斷估、冇痛苦」,不妨睇睇和黃業務結構,貼吓邊一瓣有機會跑出。
話和黃至係大笨象絕不為過,佢喺全球54個國家都有業務,核心簡單講可分為5大類:港口、中港地產及酒店、零售、能源及基建及投資、電訊。大家最熟係貨櫃碼頭業務,目前喺25個國家共有49個港口。零售靠屈臣氏,係全球最大嘅保健及美容產品連鎖零售集團,分店8400間。電訊業有全球品牌「3」,一直係拖住集團嘅尾巴。
瓣數多分拆堪期待
仲有超人口中嘅寶貝——赫斯基能源提供穩定資金流。市場一直有消息指集團計劃今年5至7月分拆赫斯基亞洲業務在港上市,集資超過10億美元,實在令人期待。
最後亦係較易被忽略嘅,其實和黃係1/5隻內房股,去年上半年物業發展溢利增加28%,地產業務佔集團收益總額6%,不過佔EBIT有成18%咁高,絕對係今年嘅增長引擎。因為目前和黃旗下和黃地產發展中項目包括北京、重慶、廣州、上海、深圳、西安、珠海等,當中以廣州及深圳貨源最充足,番禺「珊瑚灣畔」低密度住宅,總建築面積約50萬平方米,現時賣緊每平方米約1萬元(人民幣.下同),係合理價錢。
價錢唔合理嘅就索性封盤,同樣係和黃地產嘅觀湖園,喺著名高球會觀瀾湖側,建築面積約16萬平方米,去年中開賣銷情甚佳,現時別墅叫價3.5萬元,春節後再開盤。
點解發展商唔早啲出貨,唔怕宏調?因為幾個月前,附近觀瀾橫坑水庫片區兩塊總面積28萬平方米嘅地皮,由金地集團以24.4億元投得,每平方米8617元。
胡孟青