咪睇巫斯義年近半百，埋身肉搏一啲都唔輸蝕畀後生仔，賀歲賽佢頭場贏完「綫路財星」，之後再連場入Q，尾場更以「好靚仔」埋齋起孖，個人跨年連勝四日，由蛇年威到馬年。「好靚仔」初跑千六順利後上再建一功，既帶挈大熱門今日由第七場開始直落贏到尾場，亦成為沈廐季內首匹三捷馬，「好靚仔」出道兩季累積五W，將評90分以上，進軍今屆打吡事在必行。同場「飲食世界」及「喜勝多」跑獲平頭第四，尾場四重彩遂有兩瓣派彩，亦係此彩池復辦後首次。