《蘋果日報》獨家追蹤到梁振英周二傍晚在中環登上座駕去咗中聯辦，周三頭條見報，沙膽虹都為同事努力追到呢條獨家料感到驕傲。點知昨日開車返工時，聽到新城香樹輝講到呢單新聞，話《蘋果》捕風捉影，又話唔可信云云。沙膽虹心諗，人哋都認咗去中聯辦「傾少少嘢」啦，《蘋果》有幾捕風捉影呀？有幾唔可信呀？
細聽之下，香Sir話，梁振英坐座駕去咗中聯辦，逗留一段時間後，俾亞視嘅車接走去咗亞視錄影，《蘋果》話等到深夜未見佢離開就係捕風捉影，唔可信。沙膽虹真係覺得有冇搞錯呀？如果咁都算捕風捉影，咁你香Sir咁講又算唔算吹毛求疵呢？記者又唔係差人，只能夠在中聯辦外面等，明明見佢坐住座駕入咗去，就只有等佢幾時出來，直到深夜見唔到佢坐座駕離開，亦只能如實報道「至晚上十一時梁振英的座駕仍未見離開」。梁坐咗其他車出咗去，記者無法見到，都冇辦法㗎！咁都叫捕風捉影、信唔過？
何況，記者亦有向梁振英發言人求證，又向中聯辦在場人士查詢過……一切一切都已盡了當新聞記者的本份，你就算問邊個傳媒學者，斷估都唔會話《蘋果》記者捕風捉影！