大陸女星張雨綺同前夫袁巴元近日隔「網」開火，袁巴元日前喺網上爆張雨綺同別人約會，張雨綺稱自己係「自由身」，袁巴元隨後又爆張雨綺曾婚內出軌，張雨綺回覆稱前夫因爭撫養權才出言抹黑，更公開向前夫追還錢，袁巴元便開通微博反擊張雨綺，澄清冇欠債，點知一個自稱係張雨綺閨密嘅某雜誌時裝總監余凌遠又加入「戰團」，爆張雨綺曾轉賬800萬人民幣畀袁巴元，但對方至今仲未還錢。

張雨綺經理人噚晚透過大陸傳媒否認張雨綺曾出軌到巴黎旅行或到上海開房，又指可以查出入境記錄證明所言非虛，又指離婚原因係兩人意見存在分歧，不再信任彼此，又話已同袁巴元協議好，唔再公開講大家嘅事。

噚晚袁巴元再次發微博指自己嘅道德教育核心要素係愛，「因愛生怒，為家衝冠，言語冒犯，我亦不願，此前各種表達，皆因顧念家庭，且於我個人，性情再溫和，也不能一直任由欺侮抹黑，喧囂紛擾至今，回應過後，我將繼續我的生活，也明確分手關係，不再就與張雨綺小姐二人過往感情種種做多餘回應」，最後佢希望大家能家庭幸福、生活平安。

精選娛聞，喺晒《娛果》
http://fb.com/appledailyent