話之你係易帝吖？總之唔聽黨嘅話，就連波都唔畀你打呀！

講緊嘅係新一季中國籃球聯賽（CBA），第二輪賽事，廣東作客深圳。講真，中國籃球有咩值得講，大家心中有數，之但係「易帝」易建聯回歸有湖人唔打，寧願返CBA做廣東隊大佬咁大件事，就梗係要跟進下。大家都知道CBA要求所有球員都要著偉大嘅李寧牌波鞋比賽，但係易帝身為「九五之尊」，佢嘅贊助商其實係一剔。

開波前，易建聯其實都屈服著咗李寧牌落場㗎，不過打到第二節，易帝就嚟料啦。佢除低對李寧牌波鞋再行出場，然後再著返自己嘅一剔波鞋，諗住行返入場繼續打波。咁現場梗係有人阻止易帝啦，因為按照規定，唔著指定嘅李寧牌係唔可以打波㗎。結果，易建聯就無得再落場，只能夠著住對一剔波鞋行番入更衣室。到底易帝係因為著住對李寧牌波鞋唔舒服所以要換鞋？定其實係一早就有呢個計劃同劇本，要搞場大龍鳳呢，就真係得佢先知啦！