呢一篇文章係寫畀同marketer拍緊拖，或者結咗婚嘅另一半閱讀。

作為marketer，我了解marketer的難處及有些時候的身不由己。At the same time，我亦明白與marketer相處的無奈及有些時候的氣餒。

以下幾個錦囊，希望幫到大家更了解marketer，從而令你哋溝通和順，家宅平安。

一、了解Marketer的時間觀念

大部分marketer都有自己一套的時間觀念，懂得捉摸伴侶的一套尤其重要。例如你約咗佢睇7點半，佢6點半時WhatsApp你話：「BB，我send埋個email就走得。」咁即係代表佢仲有嘢忙緊，最少一兩個鐘後先走得，而唔係真係打完一個email就會離開。

於睇戲途中，亦請大家要有心理準備，marketer需要時不時離開座位。

「我出一出去講個電話。」通常呢句說話代表佢有急事要處理，除咗講一個電話，通常仲要send埋兩個email同覆多四個WhatsApp，所以無45分鐘都唔會返。

要避免爭執，最直接嘅方法就係避免喺星期一至五約marketer睇戲。如果必須要睇，就可以考慮將睇戲呢個節目寫入佢嘅Outlook calendar，設定每15分鐘提醒佢離開座位。

WhatsApp已讀不回，或是讀後隔兩個鐘先回的情況亦是常有的事。但請相信我，marketer不是有心已讀不回的，他們只是經常被其他同事或上司分散了注意力。須知marketer係辦公室內一位「萬能俠」，事無大小都關marketing事，所以唔知有幾多次啲message打到一半，就畀老細叫去開會。所以marketer其實只是情深說話未曾講而已。

二、問適當的問題

與marketer相處，有啲問題你最好唔好問。例子及註解如下：

1.「你個樣做咩咁攰嘅？」——其實呢個問題亦等同問「哇，你個樣做咩咁殘？」的意思。聽後，marketer會立即心裡感到委屈，跟隨講「我咁辛苦日日OT，你都唔體諒我，仲要話人，嗚……」

2.「咦，你今日又出event咩？」——呢個問題就等同問：「哇，你做咩着得咁hea？」聽後，marketer反應同上。

3.「今晚幾點走得？」——講真，有時連marketer自己都唔知幾點走得。明明應承自己今日要早啲走，但最終做下做下，就已經要叫OT meal同call的士返屋企。為咗減少不必要嘅盼望，或者迫你嘅伴侶講大話，都係少問呢個問題為妙。

三、分手唔該擇日

如果真係覺得對方不適合自己，想提出分手，請你盡量選擇周六或周日，中午至下午的時間提出。因為星期一至五，marketer放工後其實並不是真的放了工。覆同事email、覆上司WhatsApp、準備第二日的presentation及event，好多marketer於放工後其實仍然處於作戰的繃緊狀態。如果呢個時候提出分手，相信沒辦法做到理性及有質素的討論。

如果只是希望以分手作為手段，威嚇伴侶作出改善，於weekday向marketer提出，最後真正分了手的機會將會很高，所以請三思。有讀者於我們的page概括得好，「手可分，但稿期不可以甩」。

多一份了解，多一份關懷，marketer都可以係你嘅好伴侶。共勉之。

P.S. 如果有任何關於同marketer相處嘅愛情問題，歡迎inbox或email我哋，我哋會盡量提供適切的情緒輔導。


專欄作者簡介：
我做Marketing
由Michael及Derek兩位marketer創立的媽劇停平台。撰寫市場及職場文章。著有《我做媽劇停》及《暖男之道》。

Facebook專頁：
https://www.facebook.com/iDoMarketingHK/