當年今日

2002adidas最新波鞋率先睇全部玩高科技

蘋果日報 2002/02/24 00:00


今年可以話係adidas最揚眉吐氣一年,先有adidasX山本耀司波鞋推出,再有世界盃大力推銷其新足球鞋,之後又有大量Original復刻狂出,而唔少日本牌子更同佢玩CrossOver!相信今年想唔紅都幾難,試問點可以唔入番一兩對。至於新一季有乜好嘢,睇睇行貨上半年時間表就發現全部玩高科技同埋物料,即將推出就有CLIMACOOL同埋a3,設計有別於以前土樣,而a3更勁似NIKEAir,唔通要爭做一哥?

記者:馮彥彰 攝影:楊錦文
行版高科CLIMACOOL率先睇
行版CLIMACOOL又有E形鞋之稱,正如其名對鞋個大E字,因為鞋身冇鞋帶,以一個E字的魔術貼打孖做成,都算係波鞋新科技。至於個鞋正式名叫:CLIMACOOL,自然又係專有新物料,科技嘢唔講咁多,但簡單一句:CLIMACOOL係一層透氣超薄唔吸汗物料,使着上身更舒服更透氣,而日後會有大量以CLIMACOOL推出嘅鞋,分別有跑鞋,籃球鞋同埋網球鞋,而當中唯獨跑鞋會保留E形設計。
CLIMACOOL360o透風鞋料
CLIMACOOL用料超薄,可以360°全透氣,(只有鞋底小部分被底膠遮住),着上身後一路行一路透風,連鞋底都舒服埋,絕對係波鞋史上新科技,不過咁設計的話,如果行去濕滑地方時咪好大劑?
行版顏色率先睇
今次行版都有唔少獨家色推出,而到六月為止,總共會有五款顏色推出,有部分只係女裝獨有色,所以入貨要小心,買錯男裝鞋就失禮死人,而以香港人買鞋習慣而言,相信白色同埋藍色會最受歡迎,加上着上後又好舒服,而且鞋身超輕;跟埋日本仔興風玩魔術貼同埋顏色,相信今個夏天,係MustHaveItems!不過落雨着出街一定後悔!大家記住過埋下個月,四月中好排定隊入貨。
a3新鞋力撼NIKE
今年adidas另一主力a3將會係四月後adidas全力推出新系列,到時重會有唔少活動迎接佢,據知佢會成為日後主力鞋系列。至於佢又有幾特別───就係鞋底部分加入Air!十足十NIKE Air一樣,真係橋唔怕舊最緊要受,而adidas就的Air叫做a3,就更加多功能,除可以作保護作用及緩震功能外,重有導向功能!
a3新鞋全面睇
到今年上半年為止,a3會推出三種色,暫時主力跑鞋方面,而最搶眼都係對紅白色版,另外藍銀都OK,相信推出時會同NIKE有得爭。至於鞋款就男女裝都有,不過要成$1,000大元,都算係adidas少有貴價跑鞋了。
售賣點:
adidas
地址:尖沙嘴海港城2202店
電話:27306685