薑係老嘅辣！周五美國田徑錦標賽男子100米決賽，35歲飛人基寧面對造出全年最佳時間9秒82、21歲田納西大學師弟基斯甸高文（Christian Coleman）來襲毫無懼色，喺逆風環境下跑出9秒95，個人第4次成為美國王者！呢位2004年奧運金牌得主將連同9秒98嘅高文，以及10秒06嘅比查（Christopher Belcher）代表美國出戰8月倫敦世錦賽。

基寧取得參賽資格，亦意味佢將會同跑畢世錦賽後退役嘅牙買加「飛人」保特作最後一次決戰。雖然自2010年就服用禁藥完成4年停賽令復出後，基寧9次同保特鬥法，只曾喺2013年鑽石田徑聯賽羅馬站取得唯一勝利，但佢依然希望親身參與歷史最終章：「呢刻絕對係一個時代嘅改變。我一直希望同紀錄保持者競爭，當我回歸跑道時，我同自己許下嘅目標，就係可以同佢肩並肩鬥至最後一刻。」