中環在線:大台精神 永無益人 - 李華華

蘋果日報 2011/02/23 00:00


大台本應有大台嘅氣度同風範,被坊間譏為「是是旦旦」嘅是旦台,近排唔知點解,突然喺某啲事情上變得好唔是旦兼非常堅持,佢哋落咗個新規定,唔畀該台財經記者訪問嘉賓影到任何媒體嘅BackDrop,同埋其他行家支咪上面嘅Logo。
唔知係咪新阿頭嘅指使,假如係真嘅話,相信呢個台嘅記者會好無所適從,因為要喺行家問完之後,再叫被訪者搵個位再講多次。
老實講,唔係個個受訪嘉賓都咁得閒將同一堆嘢講兩次,難得噚日位嘉賓港交所主席夏佳理,唔介意企多一陣,電台主持就覺得好怪雞,明明企喺BackDrop前面跟大圍做完訪問,仲要俾個大台記者當咗直播室係自己屋企一樣,要搵到一個後面無電台標誌嘅位置做獨家,真係難為晒個記者嘞!