衛詩雅今日喺觀塘出席2017 NBA總決賽觀戰派對，活動中，佢大派球衣，每個球迷都爭住要，合照時，詩雅被吉祥物偷吻，搞到佢狂笑。

講到籃球，詩雅就話自己都好鍾意睇籃球比賽，因為節奏快，唔會有悶場，佢仲話今次係第一次同咁多人一齊睇比賽，感覺氣氛好好，因為平時都係約朋友喺屋企睇：「我有個夢想係去現場睇NBA，一生人總要有一次。」問佢識唔識打籃球？詩雅話：「唔係好識打，但喺小學嘅時候，我有打過女子籃球隊，當時我係做後備，但後來我由陸路轉去水路，因為五、六年班入咗泳隊，之後仲做埋救生員。」詩雅笑指自己嘅屋企人都好有運動細胞，佢同爸爸同樣鍾意游水，細佬係全場總冠軍，而家姐就係籃球隊。

問佢做佢男友，要唔要鍾意運動？詩雅話：「會加分，正如我細個都會暗戀籃球隊學長，去籃球場望下佢打波，呢個係每個少女必經階段。」以前有冇陪男朋友睇波？佢話：「都會，啲男朋友開頭會一齊睇，但後來就撇低我同朋友睇，所以我希望將來嘅男朋友肯帶我去現場睇，因為我見過有人喺NBA球場求婚，好浪漫。」