宋仲基呢期真係旺，咩選舉都有佢份，最新一個就係佢同missA成員秀智成為「黑色情人節（BlackDay）最想同他/她一齊食炸醬麵」嘅明星。

黑色情人節係指每年嘅4月14號，即今日，係專為單身人士而設，呢一日喺情人節同白色情人節都收唔到或者送出禮物嘅人會相約一齊食炸醬麵，藉此消除形單隻影嘅落寞感。

有結婚公司早前向韓國348名未婚男女（男性120人，女性228人）進行「黑色情人節最想同他/她一齊食炸醬麵」嘅調查，結果宋仲基憑住熱爆劇《太陽的後裔》入面「劉大尉」一角，以54%嘅得票率奪得No.1，女子組方面，就由已經有李敏鎬oppa做男友嘅秀智BB，以39%得票率奪冠。

至於「最想請他/她吃炸醬麵」嘅調查中，《請回答1988》男星朴寶劍以44%冠絕男星，而女團FIESTAR成員曹璐就於女星榜排名第1位（32%）。

另外，秀智BB今日率先為7月首播嘅新劇《任意依戀》造勢，公開了同拍檔金宇彬及林周煥嘅合照。