美國聯儲局議息期間美股市況好似Program咗咁,好似跟晒公式行,議息結果公布前,個市靜番啲,油價推番高啲,搞到港股冇晒方向感。不過昨晚議息完畢,今日港股應該好炒啲。
港股昨日靜如深海,上晝指數冇乜大變化,仲係靠隻中移動(941)撐場,好多喺金魚缸邊睇市嘅炒家都瞓着晒,幾十億勾塊地皮出嚟,啲地產股都唔表演吓。國企股就算係郁嗰啲股份,都好似郁得好保守,跟炒嘅唔係好進取。油價同金價呢幾日好飄,炒家都好謹慎,唔會輕率亂炒。啱嘅,𠵱家個市搵餐晏仔都唔係好易,小心啲係啱嘅。
唔少股民都有抽工行(1398),但反應太踴躍,只認購1手,10個人就先得7個人有份,之不過如果抽中咗,應該都可以輕輕鬆鬆搵餐晏仔,有老友問聽日掛牌,應該係買定係沽,照睇工行上市之後好有機會炒上4蚊樓上,大家可能要等多幾日或者1個禮拜,先見到呢個價,但係跌番落招股價嘅機會就唔會好大,如果抽到1手,喺3.6元樓下買多手,值博率都幾好。