38歲嘅徐子珊，15年離開無綫後，發展一直麻麻地，去年佢就經樂易玲嘅穿針引線下，加盟咗王祖藍同邵氏兄弟電影公司合資嘅「手工藝創作有限公司」，一心轉攻大陸市場，但今日就有報道話子珊對祖藍有啲微言，話祖藍未安排佢拍電影，仲扭計要放一個月大假呢！

子珊入行11年，喺大台拍過好多劇集，仲差不多全部都係主角，可惜呢啲劇集對佢喺大陸嘅知名度冇乜幫助，所以佢簽咗祖藍後，祖藍都出盡佢喺大陸嘅人脈，希望提升子珊喺大陸嘅知名度。報道入面嘅知情者講，大陸真係有好多又靚又後生嘅女演員，真係幾時輪到子珊吖，但係祖藍一直都好俾機會子珊，經常向大陸嘅製作團隊推薦子珊，等佢可以參加真人騷節目之外，祖藍仲會安排子珊做佢演唱會嘅嘉賓，真係對子珊好好㗎！但知情者就話，子珊簽祖藍時，係講明對方會度身訂造一套電影俾佢，同想執導演筒，可惜一直都冇影，子珊就係咁同人呻，仲當住祖藍面扭計話要放一個月假休息。