公民黨今晚喺九龍灣宴開34席，慶祝創黨10周年，由於只邀請咗財爺，而財爺因為要出席青協活動撞時間嚟唔到，所以無官員出席。而為超越前年籌款200萬數字，除咗公民黨區議員余德寶和有公民黨「狄易達」之稱嘅區議員鄭達鴻首度化身「啤酒男」，為賓客斟香港本土釀製嘅「獅子山啤」，每杯100元籌款外，仲有唔少名畫、余若薇嘅書畫、連紅酒、名牌手袋都有得拍賣。

雖財爺沒空現身，但唔少名人都力撐公民黨，包括港鐵行政總裁梁國權、自由黨榮譽主席田北俊、政務司前司長陳方安生等，前廣播處長張敏儀更喺場刊落咗2版廣告，寄語公民黨「繼續向前、樹木樹人」。

最令人意外嘅，係港姐冠軍麥明詩男友林作都現身公民黨黨慶。林作話係因為去年年底加入咗余若薇間chamber，今日chamber包咗枱，加上平日都經常見到余若薇，大家都好熟，所以出席都好正常。

民主黨單仲偕、民協主席莫嘉嫻、學民思潮前成員黎汶洛、「傘兵」楊雪瑩亦有出席公民黨黨慶，有小食店則捐出300底砵仔糕，唔少賓客都讚好味，包括平日甚少食砵仔糕嘅田少都大讚。