超級大作《星球大戰》（Star Wars）外傳一部接一部，當中最矚目嘅莫過於主角漢蘇奴(Han Solo) 前傳故事《Han Solo：A Star Wars Story》。呢個角色當年令夏里遜福（Harrison Ford）一炮而紅，正當部戲仲有一個月就剎科，監製兼電影公司嘅主席Kathleen Kennedy就突然宣佈兩位導演Phil Lord同Chris Miller因「創意分歧」而辭職，更公佈接任人竟然喺荷李活極有名嘅金像大導朗候活（Ron Howard）！

呢個消息一出，絕對震驚影壇，事關作為拍過《阿波羅13號》（Apollo 13）、《有你終生美麗》（A Beautiful Mind）、《達文西密碼》（The Da Vinci Code）等大作嘅金像大導，朗候活絕對唔需要執二攤。偏偏，同「星戰之父」佐治魯卡斯（George Lucas）非常熟，可能就係因為咁先出手相助。主席Kathleen Kennedy就話：「喺Lucasfilm入面，我哋相信每部作品嘅目標都係帶出佐治魯卡斯40年前嘅精神。因此，我哋好高興咁宣佈，朗候活將會接棒執導漢蘇奴外傳電影。我哋有好好嘅劇本、演員同團隊，佢哋都好投入去做好套戲。電影將會於7月10日再開鏡。」隨住新導演終於塵埃落定，電影將會於原定日期，下年5月25日上映。