今屆立法會選舉中，成功喺港島取得八萬幾票嘅公民黨，噚日喺香港公園一間餐廳搞慶功宴，有個神秘嘉賓到場，就係陳四萬。選舉後久未露面嘅陳太噚日話，最高興係見到泛民能夠保住23席，期望泛民未來四年，就大是大非議題團結一致，幾個黨派有商有量，對香港先係好事。

陳太又話，期待港府推出嘅政改方案，佢會透過民間策發會提意見，同泛民裏應外合，「未來你哋都會繼續聽到我發聲。」煲呔下個月發表施政報告，陳太認為應該喺政改同改善管治方面多啲着墨，佢透露未來一星期，亦好可能會發表聲明表達立場。
之前落力助選，小休後陳太繼續發功，近日忙於搬遷寫字樓，逢星期五會返母校同師妹傾偈，日後會多搵機會接觸年輕人。余若薇噚日話好感激陳太瞓身為公民黨拉票，又講述過去三次參選滋味。第一次參選乜都唔識，任人擺佈，談不上感受；第二次同其他人合組名單，覺得始終唔係一個團隊，未能盡情發揮；今次首次以政黨名單參選，整個團隊全程拍住上，佢唔止享受成果，亦好享受過程。