龍珠迷今次有得煩喇！因為由Bandai推出的Figure-rise Standard系列模型，正式殺落香港所有模型舖，打響頭炮的，是《龍珠Z》的超西悟空及菲利。或者你會問，佢同早年推出的MG FIGURERISE 1/8系列悟空有乜唔同，首先係是模型成品的身高，舊版本的MG FIGURERISE 1/8系列高度為22-23cm，而全新的Figure-rise Standard系列，超西悟空為18cm高、菲利則為13cm高；其實只係略細咗一個碼，不過模型的誠意，從盒面都感受到，首先是手腳關節位，駁位收在肌肉與肌肉之間，完全不突兀，不過「底褲位」的問題，由於要照顧到超可動性，都係有大大個空隙。
正式成品如何？暫時記者都還未入手，因為價錢都相當飄忽，旺角見報價是悟空$195、菲利$169，深水埗見略平，悟空$160、菲利$140；灣仔有模型舖報稱一出已經馬上斷貨，估計呢兩隻模型有機會被炒高。另一關注點，就係續後同系列模型會有乜？暫時已確定的，就是9月有悟飯、斯路完全體，10月是比達太空艙！再加上剛過去5月的日本靜岡模型展中，展示過會推出的肥、瘦版布歐、超西3悟空、比達、杜拉格斯、時光機……初步完成的樣品都已經達16件，相信老模型迷們，再不用怕上回MG版一樣，出幾隻就馬上無晒影的問題。
查詢：福利模型（深水埗元洲街66A地下）
記者、攝影：朱崇德