文革曾上京面聖，總理溫家寶指示佢要向創新、知識、人才同環境四方面發展。香港官員有幾創新大家有眼睇，改善環境方面亦唔見得成績顯著，立法停車熄匙、收膠袋稅有冇效都未知，喺知識同培養人才方面每年花好多錢，不過好多家長仍然用腳對香港教育制度投不信任票，講到教育，都係前宗主國勝一籌，呢點相信大把高官認同。
近年英國牛津猛吸香港、內地生，由10年前每年約70人，大幅增加至今年逾806人，為方便香港學生面試，牛津特別喺香港設立第一個中國辦事處，呢個係牛津全球三個辦事處之一，其他兩個分別喺北美同東京。牛津咁重視香港、內地生，因為中國人相信書中自有黃金屋，係非英語國家中最捨得又畀得起學費者，移船就磡理所當然。

肥彭教路開「基地」

牛津中國辦事處位於上環，噚日舉行開幕儀式，牛津發展總監康寧安（SueCunningham）透露，籌備開設呢個office期間，前港督、牛津校監彭定康都有畀意見，有佢指點順利好多。揀喺上環開office唔使捱咁貴租，唔知係唔係肥彭教路。佢哋仲入鄉隨俗切埋燒豬，可能都係肥彭教嘅。花費咁多人力物力喺香港開個辦事處，梗係唔係淨係用嚟面試咁簡單，康寧安坦言辦事處仲有個重要任務，就係聯絡超過1,600個香港牛津舊生同捐錢畀牛津嘅善長仁翁。講白啲，即係負責揼人心口，幫牛津搵大水喉。據統計現時只有百分之五牛津舊生有定期捐錢回饋母校，可見呢條水潛力十分巨大。
牛津咁進取東來吸水，係因為死敵劍橋兩年前展開一個七年籌募10億英鎊（約160億港元）大計，舊年4月校內高層總動員嚟香港搵人捐錢。對手搶佔先機，牛津更加唔可以怠慢，一於喺香港設立「基地」，兩間大學由英國鬥到香港，人又要錢又要。噚日有份主持開幕儀式嘅牛津副校長杜凌德（JonDellandrea）就係「人肉招財貓」，佢曾經幫加拿大多倫多大學籌到10億加元（約78億港元）經費，由於佢「戰績」彪炳，牛津特別撬佢過檔環球吸水，至於喺香港成績如何，下回分解。