方嘉柏馬房上季經過低潮期，換來大部份馬匹評分下調；然而今季季初積極操練，亦證明廐內馬匹健康全面復甦，周三晚（5日）谷草首戰，向來是方廐主場，配合一哥潘頓應戰，將是明晚鋼鐵組合。

第六場三班1200米：「同進」過往三冠兩季俱在同程取得，上季十月初同程輕取受讓13磅的「索先生」半馬位，其後健康出現問題而缺陣五個月，復出跑過兩仗俱第五，表現不過不失，四至六月有正常操練，六月尾試閘後發現受傷立即提早唞暑，八月復課至今操練一氣呵成，上周四（8月30日）出王牌報名後翌日，即安排試大閘作最後試跑，抽二檔靚位，好明顯目標在今仗。

試嘉年華閘見好有「旺舖大師」，快馬用黃俊減十磅，動機就係要放甩為止，主要對手所在。

其次再揀「香江穩勝」，苗禮德接手後肯放膽去做，大舊飯頂得住辣操，絕對好事，埋門跳草地見利敬國滑水姿態造22秒4，就知銳不可檔。「幻影飛鷹」試大閘要騎，相信與濕泥有關，加配備可望幫助搶閘反應。

第七場三班1650米：「琴心星」是今季目前為止，試閘中最搶眼一匹，絕少見以君臨天下姿態逢馬過馬，與上季試閘相比，懶性重判若兩駒，再睇上季最後一仗大熱門，末段無位，潘頓立即企高身收韁過終點，根本無跑過，原庄配搭捲土重來，交代是時候。

「鋒芒畢露」前領馬有減磅優勢，除開縫換眼罩會帶來新鮮感。「可愛寶」向來要靠快步速才可以發揮威力，今次賽事形勢有利，馬房打王牌上陣，亦可加入戰團。

再揀狀態見好的「萬事醒」，上季中開始斂口即在同程取得四捷，其中黃皓楠三騎兩冠一季，上名率百分百，絕對可靠。