【記者林賽香報道】新學制下今年有四萬名未能升學的青少年投入勞動市場。人人以為搵工爭崩頭,實情是有工無人做。今年適合中學畢業生的職位有增無減,飲食及零售業最渴求人手,惟後生仔心頭高、怕辛苦不肯入行,令個別行業請不到人。有人事顧問稱,年輕人必須因應個人強弱能力搵工,才可成功就業。
中原人力資源董事總經理周綺萍指出,今年中學畢業生比大學畢業生更易搵工,「啱大學生嘅銀行或者金融業職位少咗三成,但飲食、建築、零售業呢啲啱中學畢業生做嘅行業好好景,職位增加兩成」。
勞工處資料顯示,今年上半年共有56萬個職位空缺,較去年升近四成,暑期工空缺較去年升近兩成,惟統計處最新公佈失業數字(本年4至6月),15至19歲失業率達14.8%,微升0.7%。
為青少年提供職業輔導的聖公會麥理浩夫人中心部門主任林志宏表示,適合中學畢業生的職位有增無減,惟青少年搵工「揀擇」,「好多都要求人工高、地點好、工時穩,對追quota(跑數)或體力勞動嘅工,都耍手擰頭」。
林志宏又稱,最低工資效應令薪酬普遍上升,以保安為例,人工增幅近三成,由去年約8,000元增至逾萬元,但僱主仍反映請人難,「想請後生仔都請唔到」。他表示,年輕人搵工越來越「奄尖」,「佢哋鍾意寫字樓工,厭惡體力勞動,但冇考慮自己嘅學歷同經驗係咪啱份工,所以有人搵極都搵唔到」。