年尾市況超靜，但12月個股走勢有啲唔尋常，就好似上回提到高端消費股連日跑輸大市，反映越受惠強國增長概念嘅股份，越唔着數，而A股又好似無底深潭。家要A股同強國概念股份識得反彈，短線只得兩個情況，第一就係衰嘢浮上面，但暫時唔見有好多人確實講到A股下跌嘅理由；第二就係等超賣。晉佳偏向認為要等超賣先識大反彈。
今個月晉佳短線只選擇兩類股，第一係美國概念；第二係博盈利防守性高嘅股份炒上落。燃氣股本身盈利防守性夠高，但係有唔少股份俾併購風波攔住咗，所以成個板塊近期都明顯回落，其中，華潤燃氣（1193）近期收購鄭州華潤燃氣（3928）又怕被股東否決，中石化（386）同新奧燃氣（2688）收購中國燃氣（384）亦有枝節，短線炒上落嘅話，買入上述股份就面對多一種風險，剩番嘅選擇就有港華燃氣（1083）同昆侖能源（135）。
論股價走勢，港華燃氣相比昆侖能源為佳，至少前者呈窄幅上落趨勢，而後者似係短線一浪低過一浪，走勢以港華燃氣勝一籌。
論業務，港華燃氣係中華煤氣（003）旗下嘅內地燃氣業務分支，預測2011年市盈率17.7倍，市賬率1.1倍，股東回報率僅5%左右，其中一個原因係透過收購業務擴充，令商譽增加，商譽佔資產淨值三分之一，無形資產比例較重。燃氣股一貫盈利增長大概兩成至三成，以券商平均預測港燃今年每股盈利升36%計算，預測2011年市盈率17.7倍其實唔算貴。

港燃喺12月尾至1月初都可能有炒上落嘅機會，呢隻股9月到家，試過3次升至4.50元左右嘅水平，證明佢唔係升市先有機會反彈。你見到佢個周線圖，或者會話港華燃氣可能醞釀緊三頂，似唔好嘅兆頭，但係燃氣業務盈利防守性高，除非市場出現恐慌性拋售，否則會有唔少基金選擇停泊，股價未必咁易跌得落，所以晉佳估佢短線內延續窄幅上落，形成長方形機會較大。
投資者可以考慮響接近250日線4.10元水平吸納，升到接近4.50元沽出，賺接近一成波幅，明顯跌穿4元就止蝕。

晉佳
本欄逢周一、三及五刊出