關智斌（Kenny）同張致恆（Steven）噚晚喺圓方為電影《潛艦滅殺令》出席首映禮，老闆楊受成都有現身。剛完成演唱會嘅佢哋，問到下一步是否進軍紅館？Kenny話要問老闆，有得開固然開心：「我哋之前只係一個project，慶祝Boyz十周年，之前冇諗到咁好反應，多謝大家愛戴，但要先唞一唞，長期對住Steven都幾辛苦。」又笑言：「其實上星期完結後，同Steven已經冇咩聯絡。」

不過旁邊嘅Steven就踢爆Kenny日前請朋友返屋企食飯，但唔識煮皮蛋，要致電俾佢求救。而上次九展演唱會，Kenny稱知道部分歌迷喺網上買飛時被呃錢：「當晚只能坐喺九展門外聽歌，聽到我好心酸，本來有諗開多場，但真係無期。」

提到張敬軒受訪時話，如果Boyz去紅館開騷一定幫手，Kenny話：「如果有機會去大啲場地，冇佢都唔成事。」咁Kenny有冇好感激軒仔視你做最緊要嘅人？佢話：「我哋識咁多年，係好好朋友。」Steven就幫口話軒仔對佢同樣緊要：「今次除Kenny外，我最感激嘅就係軒仔，完騷後有幾晚同軒仔傾電話，因為我係一個好自卑嘅人，佢一直都好鼓勵我。」

精選娛聞，喺晒《娛果》 http://fb.com/appledailyent