報紙財經版大字標題話調整恐快臨，係時候調整投資策略。個人投資組合裏面，最多人忽略應該係每月都要供款嘅強積金，原因可能係大家仲未有得自己揀積金受託人，覺得投資好被動。
積金受託人冇得揀，唔代表成份基金冇得揀，雖然強積金嘅投資理念係「平均成本法」，理財專家亦話，市況唔好，基金價格便宜時可買多啲基金單位，市況好時，所持嘅基金組合會水漲船高，但要提升回報，更好嘅做法當然係「低買高沽」。

兩個月仍算短線投資

投資市場變幻無常，之前曾經聽過一位理財專家講，家陣好多基金投資者嘅投資態度，都由長線變得相對短線，當然未至到好似股票咁，玩即日鮮，但對於投資基金嚟講，一、兩個月已經算短。
更改積金投資組合，原理同投資股票換馬分別不大，就好似近排港股暢旺，股票基金7月份投資平均增長9.61%，跑贏其他成份基金，但一旦大市調整，會影響股票基金嘅投資表現，如及時贖回基金單位，換馬去其他同股票基金表現相反嘅成份基金，好似債券基金或者貨幣基金，就可以鎖定回報。
如果驚轉咗投資組合會錯過低吸良機，大可採用互補策略。就以敏妮為例，由於投資屬進取型，投資組合幾乎全部係股票基金，咁嘅話，可以將已供嘅股票基金贖回，轉去穩陣嘅基金類型，至於每月新供嘅，就繼續買股票基金。
遇到一直跌市，雖然基金單位會越買越平，數量越買越多，但真係一沉不起，揸住嘅都係蟹貨。
溫敏妮
http://wanmanli.com/blogs/