今年46歲嘅黎姿﹙現名黎珈而﹚，佢14歲就入行，曾拍攝不少電影同電視劇，經典角色多不勝數。07年其弟黎嬰發生嚴重車禍，翌年黎姿為照顧弟弟及打理其開設嘅皮膚護理中心，宣佈退出。去年1月，佢出任主席嘅醫學美容集團卓珈控股，於創業板上市，佢嘅身家即時翻幾倍，成為億萬富婆，更被譽為最靚嘅CEO。咁黎姿嘅經典角色，大家又記得幾多個呢？

電影《飛躍羚羊》
戲中飾演田徑運動員何寶兒嘅黎姿，合作嘅仲有袁潔瑩、羅明珠同鄭文雅，當時黎姿只有15歲，配上當時流行嘅粗眉同短髮，喺影壇嶄露頭角。

電影《獄中龍》
黎姿當時演藝學院舞蹈系課程後重返娛樂圈，戲中飾演劉德華嘅老婆，其中一場沙灘透點戲份，令人印象難忘。

電影《古惑仔之人在江湖》
講到《古惑仔》系列，除咗一班古惑仔鄭伊健、陳小春、謝天華之外，大家冇理由諗唔到黎姿飾演患有口吃嘅細細粒啦！

劇集《倚天屠龍記》(99年)
黎姿版嘅趙敏係好多網民公認最為電視版經典，地位就好似李若彤嘅小龍女咁，不可超越。

劇集《金枝慾孽》
劇中飾演「玉瑩小主」，由單純變成攻心計，演繹得很好，最後佢憑呢個角奪得台慶頒獎禮嘅「我最喜愛的女主角」。

劇集《珠光寶氣》
黎姿息影前最後一部作品，劇中飾演二妹康雅瞳，同邵美琪、蔡少芬一齊鬥戲，唔使多講，都知有幾經典啦！

精選娛聞，喺晒《娛果》
http://fb.com/appledailyent