當年今日
關於我們

車仔擁躉42高齡捧盃
求驗客手記:「白旋風」韋德人老心不老

蘋果日報 2004/04/13 00:00


我求大俠除咗係足球迷之外,其實都係一名桌球迷,見到「白旋風」韋德喺星期日於格拉斯哥舉行嘅桌球球員錦標賽決賽,爆冷以九比七擊敗亨打捧盃,十二年嚟首次奪得世界排名計分賽嘅冠軍,我都好感動。
下個月就四十二歲嘅韋德,喺賽後好激動,重幾乎講唔出說話㖭!喺定過神之後,佢話:「我都慣咗喺決賽俾人蹂躪,估唔到今次可以捧盃!不過,其實我一直都知道自己有呢個實力,我知道自己只要繼續努力唔放棄,就一定可以成功。」韋德重話,今次勝利,令佢喺星期六喺錫菲爾德舉行嘅世界賽信心增強咗唔少。
來自倫敦嘅韋德一直都係英超聯球隊車路士嘅忠實球迷,唔知車路士會唔會受韋德今次勝出啟發,可以捧走歐冠盃呢?

洛賓傷舊患「收咧」紐記偷笑車仔閉翳
燕豪芬新星洛賓喺星期日嘅荷甲聯對格羅寧根時後備上陣,觸傷舊患,提早「收咧」,呢個消息兩支英超聯球隊有人歡喜有人愁。歡喜嘅自然係紐卡素,佢哋喺星期三嘅歐洲足協盃次回合迎戰燕豪芬,唔使擔心洛賓呢個危險人物;不過,簽咗洛賓下屆加盟嘅車路士就幾愁喇。
外借比甲零的突破董方卓吐氣揚眉
中國年輕前鋒董方卓由加盟英超曼聯到被外借到比甲安特衞普,都唔被外界睇好。不過佢終於喺上星期六吐氣揚眉,喺對住色格拉布魯日嘅比甲聯,首次打足九十分鐘兼射入喺比甲嘅第一球,協助球隊以二比一勝出。大家都係中國人,我求大俠當然希望董方卓嘅發展會一帆風順啦!

意甲判官矇查查佩魯賈新受害者
佩魯賈躉前晚應該過咗個唔愉快嘅復活節,睇住隊波打得好而衰收尾已夠慘,最慘係球證走漏手球同越位,扼殺咗佢哋搶分機會。連埋之前AC、祖記,呢輪意甲特別多爭議事件,受益嘅咁啱都係強隊,佢哋最終又一齊臨完場入波,故事性質相似,有乜辦法唔再惹偏幫強隊爭議呢。

被換至公牛反目成仇戴維斯搵卡達屁股出氣
季中被換到公牛嘅安東尼奧戴維斯,一直都對舊會速龍有啲芥蒂,早前更批評卡達唔夠努力㖭!可能因為咁,所以噚日速龍對公牛嘅比賽好重火藥味;結果第三節戴維斯就喺爭波時同卡達有推撞,而後者亦不甘示弱,將籃球擲落戴維斯嘅「八月十五」,結果梗係齊齊食技犯喇!