早排講過，合和實業（054）太子爺胡文新（Thomas）私人拎一億元出來成立基金，推廣本地冰上曲棍球活動，除此以外，原來佢仲積極搵地，想起一個容納500位觀眾嘅標準冰球館，暫時喺大埔發現一幅政府休憩用地，落實就要向政府申請、走程序，之後再籌款建館。

Thomas粗略計算，起呢個冰球館，投資額約兩億元，最貴係個頂部，受到土地用途限制，呢幅地只可以建館，唔可以額外起零售或其他物業，肯定唔會變成另類地產項目。
如果申請成功，佢自己出錢之外，亦會籌款，好大機會打馬會主意，事關馬會每年都捐唔少錢支持本地體育活動，包括場館建設。
佢講笑話，若想個冰球館嘅建築成本降低，可能要搵阿爸胡應湘幫手畫則，佢伺機賣口乖，大讚阿爸係全港最叻則師，最緊要到時可以免費幫手。佢話，雖然阿爸今年77歲，但依然相當精靈，日日返工，最近就忙住研究合和二期嘅規劃。合和舊年中同政府就合和二期傾掂補地價協議，整個計劃除咗起酒店、會議中心、寫字樓外，仲包括保育同交通改善計劃。

胡應湘近日就親身走去研究，點樣可以改善皇后大道東同堅尼地道嘅交通，唔係點人做咁簡單。除咗證明自己寶刀未老，佢似乎想親力親為，為呢個搞咗廿年嘅合和灣仔王國劃上完美句號。

李華華
mailto:[email protected]