港股噚日又跌224點，收報14372，成交達197.85億元。淡友力壓滙控（005），但滙豐證券在120元水平有大量買盤力撐，滙控收報120.10元，跌幅1.23%，叫做略優於大市，成交逾30億元。
除咗滙證力托外，散戶的血肉長城999買盤亦再現，滙控在120元的買盤以球計，淡友要攻陷唔容易。不過，i師傅話淡友可集中火力質低中移動（941）、和黃（013）及中海油（883），一樣可以打殘大市。中移動將公布的第三季營運數據傳可能有驚喜，唔排除稍後會出現挾淡倉。
恒指早前在15500水平見雙頂，近日連穿多個支持位，走勢異常差勁。昨日剛好在150日平均線收市，若失守，下一站將是250日牛熊分界線（14133），不過滙控低位有強大買盤支持，中移動又或者有驚喜，相信冇咁易跌得穿牛熊線。

傳徵車稅　駿威下挫

駿威（203）下跌4.63%至2.575元，成為昨日最大跌幅的藍籌股，國內傳出快將推出汽車消費稅及開徵燃油稅，加上上海汽車首三季純利大跌55%，令駿威四面楚歌。
建設銀行（939）招股反應遜預期，聽講唔少入咗大飛嘅大戶都要減碼，以免分派比率一旦大增，會失預算。建行自本月13日招股至今，恒指累跌248點、國企指數跌143點，照計唔會拖累建行表現太多，反而若有大戶抽唔切飛，所獲分配的股份大超預算，而呢種情況又普遍嘅話，則不排除建行首日掛牌會出現大舉拋售的情況。另外，美國證監會主席突然話建行不符美國上市資格，或多或少影響美國投資者認購建行的心情。
阿虎