四年冇賣樓嘅麗新發展（488）終於有新動作，佢哋同新地（016）前主席郭炳湘合作嘅將軍澳住宅項目，噚日舉行記者會，麗展老闆林建岳嘅三女林愛兒亦首度現身幫手賣樓。佢一改以往男仔頭形象，秀髮過膊，改埋名叫「顥伊」，成個人女仔晒，差啲唔認得佢！

同超盈關係撲朔迷離

29歲嘅林顥伊最令人有印象，應該係佢同賭王千金何超盈相當老友，關係撲朔迷離，而其實佢仲係一名高材生，喺香港大學完成工商管理學位，再去中文大學讀法律，舊年取得博士學位。除咗讀書叻，佢運動都唔弱，舊年獲邀加入香港女子冰球代表隊㖭。
噚日佢以麗豐控股（1125）高級副總裁身份出席樓盤記招，亦用上博士銜頭。佢主要負責介紹樓盤名嘅由來，表現得戰戰兢兢，跟前有一張手寫講稿，手字都算秀麗。但佢可能有少少緊張，一邊講，要一邊望貓紙，算係不過不失，冇乜點食螺絲。去到答問環節，佢就冇參與，交番畀幾位老臣子負責，記者會結束，佢就匆匆走人，可能都係有啲怕醜。
佢今年初接受傳媒訪問時提到，佢加入家族企業超過一年，唔係父母要求佢，而係佢主動想幫手，佢之前有份負責公司喺橫琴嘅文創天地項目，𠵱家做埋香港樓盤，似係乜都要學，乜都要做。

李華華
mailto:[email protected]