亞視去年4月1日熄機，主要死因是投資者不肯再揼水，陷入財困被迫摺埋，多次易手陸續變賣資產，亞視近日借App復活，上周開記招公佈下月29日就可以再透過OTT（Over The Top）網上平台正式復播，更高調公佈將重拍經典劇集《我和殭屍有個約會》。

不過，原來亞視其實在前年已把《殭屍》的版權賣了給美國21世紀福斯（21st Century FOX）旗下福斯傳媒集團（FOX Networks Group），去年3月還有報道傳出將《殭屍》重拍成美劇，預計拍20集，並斥巨資做特技化妝，甚至以同一題材開拍電影版。角色方面，除會選用新面孔外，還會揀選大家熟悉的資深演員，已是虔誠基督徒的《殭屍》男主角「況天佑」尹天照，斬釘截鐵表示不會接拍，其後重拍《殭屍》消息未有進一步落實。

亞視高調宣佈有意再拍《殭屍》，福斯傳媒集團昨即向傳媒發出聲明，強調：「21世紀福斯旗下福斯傳媒集團重申本公司獨家擁有《我和殭屍有個約會》、《我和殭屍有個約會II》及《我和殭屍有個約會III之永恆國度》之所有相關版權。」同時福斯又溫馨提示亞視，福斯同時擁有劇集《情陷夜中環》、《肥貓正傳》、《縱橫四海》及《我和春天有個約會》等版權。

亞視前年山窮水盡，分割資產出售，除無綫以1,000萬元買下亞視2,000小時的武打劇集，即約80套電視劇，還有粵語長片；同年蕭定一亦以約600萬元買入1,000集亞視經典舊劇，主要是爸爸蕭若元當年於亞視前身麗的電視有份製作的劇集。

新任亞視CEO吳雨昨日在亞視大埔廠房，帶傳媒參觀節目《百萬富翁2018》新佈景，他回應《殭屍》版權問題說道：「我哋入嚟時，好多嘢要跟番，睇番合約，佢哋係賣咗好多畀人，無綫又有、HMV蕭定一又有、FOX又有。我哋係攞番原來合約嚟睇，我唔知佢哋後邊有冇補充協議，真係唔知，背後真係好混亂，我哋睇過係我哋咪屬於我哋囉，咁當然我哋o依家都同FOX了解緊。咪大家傾囉，合作拍嘢咋嘛。」

若拍不成《殭屍》，吳雨指亞視仍有很多經典劇可重拍，他續說：「好多經典嘅嘢去咗第二度，相信佢哋都唔想攬住擺埋佢。難得有人想重拍，又可以畀新意觀眾，甚至乎我哋《英雄本色》都可以買到版權返嚟，其實都好多選擇畀大家。我諗呢個係一個美麗嘅誤會。」

吳雨有意孖蕭定一合作，蕭定一昨回應：「無限可能，但言之尚早。」就亞視與FOX了解翻拍《殭屍》版權問題，福斯傳媒集團發言人昨謂歡迎有意洽談者直接跟公司聯絡。

更多娛聞，喺晒《娛果》
http://fb.com/appledailyent