莫雷拉停賽，身邊不少朋友嘆無晒方向，好奇問，邊個信得過？大多數答無人信得過，要信自己！自己今期則信潘頓，基於第四至七場座騎夠分量，希望人馬都可以交出正常水準。而第八場則信史卓豐。
第八場三班1650米：上次買「高利多」，輸咗都無怨言，除因排檔差外，最慘是輸埋形勢，入直路遲發力同望空，給「威利大大」走甩近三馬位，終點前追剩唔夠兩個馬位，睇餘勢片段，過終點拉住都過晒。復課後又覺越來越靚，縱由雷神換史卓豐，都要買多次。
「金滙龍華」上次與前駒同場，賽前已強調一來負頂磅，二來未必真的次次都楔得好，事後看，其實郭能發揮無大失誤，輸在「無敵王者」應走唔走。輸完復課先養後操，埋門拍「超有利」，三段跳到1分18秒頭，末段仍勁到無倫，今場最衰又抽10檔，計落內側只有「駿將」，以及唔知快唔快得到「贏得」，可以埋到機會較上次樂觀。「駿將」穩定而無再進步，只覺跑法會繼續賺。「威利飛越」上次用潘頓以為好，點知亂跑，不單放頭，更以超快步速狂放，今場換何澤堯，孭少五磅乃最大幫助。