當年今日

  榮太子入院成謎團 - 李八方

蘋果日報 2003/05/07 00:00


中信泰富噚日召開一年一度股東大會,主席榮智健竟然缺席,不過,榮太子並非為避開沙士,亦唔係怕咗財金界長毛DavidWebb喺會上問長問短,原來係因為早排做咗個骨科手術,要在家休養。
咁榮太子究竟發生乜事,打高球扭傷定飛車撞親,抑或睇隻愛馬時俾馬踢到?中信泰富董事總經理范鴻齡就點都唔肯透露,佢話講到進一步詳情就係私隱喎,但各位榮太子老友及泰富小股東可以放心,佢康復情況非常理想,五月中應該可以返工。

加稅後賓利未發市
另外,范鴻齡話北京中信集團總部雖然有高層中招,但董事長王軍現時身體情況非常良好,有關佢喺中南海接受隔離嘅報道不實,但由於總部為避炎採取咗輪班制,王軍先至冇每日喺公司露面。
講到生意,范鴻齡話中信泰富旗下嘅大昌行亦受加稅同非典雙重打擊,新車銷售市場死寂,而且愈貴價愈死,佢話自政府三月五日宣布大幅提高汽車首次登記稅後,一輛原價二百幾萬嘅賓利要賣到四百幾萬,因此自加稅公布當日起,「大昌行就一輛賓利都未賣過」。難怪車行中人(凌志除外),真係多得阿松唔少。



傳真︰2623-9278
電郵︰[email protected]