患難見真情，DBC數碼電台主持陳達仁上月底借咗細佬部車畀o靚模盧頌之（DaDa）揸發生意外，DaDa涉嫌醉駕被捕，車上嘅陳達仁就唔好彩喺意外中右手臂骨碎裂，佢大前日入咗醫院做完手術，o依家休養緊，呢次意外，佢感恩女友SoniaWong相陪，陳達仁噚晚貼facebook公布婚訊。

陳達仁自意外發生至今，日日勤力Selfie貼fb同大家分享感受，佢噚日突然po咗同女友合照仲留言：「車遺手碎！執返條命！下一秒發生咩事無人知！女友伴我15年！高低起跌！不離不棄！其實，最大的受害者係我女友，嚟緊11月會同佢結婚！我一生一世的太太Sonia！因為我太不小心，令她受苦了！」現年37歲嘅陳達仁預告11月做老襯，婚訊沖喜獲友人留言恭賀，陳達仁就同《蘋果》話：「其實一早plan咗想結婚，成日拖住拖住，呢件事令我的起心肝要實行，如果我死咗就乜都做唔到。」大吉利是咩，陳達仁好番就乜都可以做啦！

陳達仁話揀好11月20日喺蘇梅島搞婚禮，包晒親友去，預計會花6位數字，咁到時請唔請DaDa去飲？陳達仁話：「最初我真係預咗會請埋DaDa同King（趙勁皓）去蘇梅，o依搞成咁，應該冇下文。」距離婚期仲有3個月，陳達仁希望盡快康復就影婚紗相。

準新郎陳達仁收火話唔追究DaDa，但準新娘Sonia啲怒火就仲未熄，Sonia日前喺fb數臭DaDa：「冇咁嘅能力賠，就唔好求人畀架車你揸，仲要學人飲酒揸快車，撞到乜都無就扮可憐。醫藥費都冇要求過你俾，當然你都唔會有咁嘅能力！仲喺眾人面前扮可憐，請問你幾歲？好彩嘅話做得人老母啦！調返轉出事嗰個係你男友，你會點？你男友嫌棄你唔成熟係啱㗎！我想講，你智商真係有問題㗎！你咁嘅做人心態永遠都會失敗不值得被愛！係永遠！」