當年今日
關於我們

【嚟緊20歲】鄧月平讚邵音音經常發放正能量:即使做丑角都唔介意

蘋果日報 2017/12/01 17:10

邵音音奇妙電視鄧月平女神經

鄧月平今日到商台宣傳新歌《女神經》,佢指公司解釋第一首派台歌就要將其神神化化兼無厘頭真面目示人。第一次入錄音室錄歌,鄧月平表示由於入錄音室前先收到歌詞,所以心情緊張到喊,幸好有監製安慰令佢收拾心情錄歌。
12月4號就係鄧月平嘅20歲生日,佢表示3號晚會同家人食飯慶祝,正日就約咗三位閨蜜,佢話:「佢哋叫我帶定衫、沐浴露出去過夜,搞神秘驚喜,我之後嗰日要開工,希望唔好有驚無喜影響開工。」佢透露會再約朋友食飯,講到會否有追求者?佢話冇,塔羅牌師傅亦指佢未來五年都冇真命天子,所以專心工作,更話自己純情容易被呃。
最近同邵音音合作奇妙電視節目,對於音音姐患癌一事,鄧月平都有啲驚訝,佢話完全間察覺唔到:「 同音音姐合作,發現佢係一個幾豁達嘅人,完全對佢改觀,佢真人同螢幕完全唔同,係一個好好嘅前輩,佢唔選擇去醫都係佢嘅性格,當然希望佢身體健康大步檻過。」
鄧月平形容音音姐有嫲嫲心態,好錫後輩,又係好盡責嘅藝人,不時發放正能量。佢話:「即使佢自己做丑角都唔介意,畀觀眾笑,寧願係鬧佢,只要觀眾睇得開心就好,好多時觀眾未必睇到呢一面。」嚟緊5號見面會慰問對方,佢希望有機會煮餐飯畀音音姐食,因為個節目本來約好咗上佢屋企煮飯,但係節目調動咗。
更多娛聞,喺晒《娛果》
http://fb.com/appledailyent
empty