余安安喺87年同賽車手李萬祺結婚，婚後退出娛樂圈，生咗二個女嘅安安，一直專心相夫教女，過住幸福嘅家庭生活，點知喺03年宣佈離婚。(新聞連結： http://bit.ly/2FQJkoz )

回復自由身嘅安安復出幕前工作，除咗拍電影之外，仲有參與舞台劇嘅演出。日前佢接受車淑梅喺港台嘅節目訪問，講到o依家身邊有冇追求者，佢話：「如果話冇人追就係呃你嘅，不過可能緣份未到，咁多年都未遇到一個值得行埋下半生嘅人，我擇偶條件其實好簡單，只要夾得嚟，有feel就可以。」

不過提到安安嘅情史，好自然會想到佢同周潤發嗰段短暫婚姻，安安好坦白話唔想多講︰「就係因為太快就出咗事，九個月內閃電結婚又閃電離婚，感覺就係『迷』，反正拖落去都係冇意思，大家仲有好漫長嘅人生要過。」經歷兩次婚姻觸礁，余安安話要感謝每一位曾出現嘅伴侶，就算冇走到最後，對方都係佢人生旅途上珍貴嘅另一半。

安安除咗同發哥有過短暫婚姻之外，佢嘅初戀男友亦都係圈中人，佢話：「嗰陣我14歲，放學去咗海邊咖啡廳打躉，點知有人突然嗌話有浮屍，我咪走咗去八卦，點知我後面企咗個猥瑣佬，於是咪揮手叫爾冬陞站喺我身後，咁樣我哋就開始拍拖。」不過呢段感情維持咗8年就分開，但係o依家再見仍是朋友。

安安仲話有一個人一定要感激，佢話：「呢個人係梁家輝，當年我離婚之諗住復出幕前，佢好鼓勵我，等我可以行過心理關口！」

精選娛聞，喺晒《娛果》
http://fb.com/appledailyent