友人不是一個賭波常客，世界盃期間湊熱鬧到馬會投注，本擬細細哋買十蚊玩吓，怎知原來最少一注要買50蚊，友人當堂口中唸唸有詞，又話乜嘢小注可怡情，想買細啲都唔得？又話提倡甚麼有節制賭博嘅？
一方面賭波合法化，另一方面又得提醒大家沉迷賭博等如倒錢落海，總有點尷尷尬尬。播放足球比賽時的電視廣告時段是財務公司的天下，優惠多多，錯覺有點以為唔借就笨。另一個甚麼「足智彩」的廣告，以甘小文式漫畫勸告大家不要在外圍投注，但廣告內容卻非常含糊，睇咗幾次都係以為叫大家唔好搭白牌的士或無牌小巴，咁正經嘅訊息點解要用個咁唔正經嘅方式嚟表達，諗幾日都諗唔明。

另一個廣告叫學生們「睇波不賭波，不賭樂趣多」，學生哥對我講：「若然不嬲唔睇波嘅就繼續唔睇波，如果唔係為咗賭波就唔會睇波，睇波唔賭波試問又點樣樂趣多？所以個廣告嘅口號簡直係廢，唔賭波樂趣有幾多又唔講，淨係你哋畀賭，我哋唔畀賭條氣就真係唔順，金槍不倒就話樂趣多啫……」學生哥講嘢講到冇晒邏輯，但仍聽得出非常不滿甚麼樂趣多的口號。
幾隊國家隊在球場上的表演不如理想，小外甥問我佢哋會唔會係打假波，本來想偽善地一口咬定話唔會，但想起每日大概有過百億關於世界盃的金錢在滾動吧，在如此許多萬惡的金錢面前，事情大概都會變得不純正，只好向小外甥說道：「唔知喎，希望冇啦。」