一失足成千古恨，建制派對於政改甩轆投票，真係喊都無謂，依建制派內嘅「高人」話齋，痛定思痛睇吓點樣團結再上路仲實際啦，再互相篤背脊嘅話，仲嫌大家唔夠瘀咩？而未來嘅路向檢討，當然包括喺立法會議事廳內嘅協調人、即係葉劉形容嘅「班長」角色，究竟係點？若然覺得民建聯葉國謙唔再適合揸fit，又有邊個可以擔大旗先？
有建制派議員預告，今個星期三聚首檢討，花生友唔知佢哋係咪將逢周三喺立法會嗰啲定期聚會，當係一個大團結檢討會？但無論個檢討會目的為何，都要解決一個現實問題，就係議會內嘅建制派「總黨鞭」，仲需唔需要存在？君不見田少都開到口講明，唔會聽任何一個人支笛，所以到底以後點整合議會建制派，都係一個難題。