歐洲盃踢完，美洲盃已經冇乜人理，七月十七日北京舉行亞洲盃揭幕賽，中國對巴林，打和二比二，連《大公報》體育版（七月十八日）都唔見有報道，《文匯報》體育版就有一段三四百字。祖國舉辦亞洲盃，愛國報紙都唔多理，可見氣氛之淡。
反而《南華早報》最有體育精神，竟然不惜工本，派體育記者TimMaitland上北京做現場採訪。鬼子佬講體育，唔係淨識講賭波，佢哋覺得亞洲盃係亞洲足球大事，所以派記者去，其實本地華人讀者冇興趣，外籍讀者唔通會反應熱烈咩。左丁山向《南早》嘅體育精神致敬。
TimMaitland報道咗一單趣聞，就係亞洲足協秘書長韋立本（馬來西亞人）（PeterVelappan）在揭幕禮後開口大罵中國人冇禮貌，北京唔值得主辦奧運會，佢鬧北京三宗罪：（一）北京話揭幕禮會全場爆棚，起碼有六萬五千觀眾，但只有三萬五千人入場，韋立本質疑中國人點解唔入場捧中國隊；（二）國際足協主席白禮達致辭時，全場噓聲四起（記者話此乃誤會，因為白禮達致辭時，球場大螢幕上播出中國足協副主席YanShiDuo嘅肖像，球迷係噓佢！後來改播出白禮達，球迷立即歡呼）；（三）巴林國歌播出時中國球迷嘈生晒。
韋立本其實最唔鍾意大球場內空櫈太多，等佢喺國際足協主席白禮達面前，失晒面子，佢聲言如果北京球迷對足球冇興趣，以後都唔會畀北京主辦大賽事。呢位韋立本對中國認識甚少，中國球迷恨鐵不成鋼，唔鍾意睇中國隊失威，竟然打唔入奧運；而且中國球迷未國際化，科威特對阿聯酋呢啲賽事，入場送叉燒飯都未必有人有興趣。