曾經迷倒唔少宅男嘅「前輪后」趙海珠（珠珠），變身全職媽咪半年，阿仔轉眼亦21個月大。佢𠵱家其實都幾似李嘉欣、周慧敏等女藝人，間唔中就接拍廣告保持曝光率，新近佢就幫一個奶粉商嘅網上教育短片做主持，短片聽日喺網上有得睇，粉絲又可以見佢一面嘞。
今年33歲嘅珠珠，一早就被公認為好命水，工作方面，由「新聞之花」到「輪后」，轉去幫地產商賣樓，再變為全職湊仔，順風順水；最重要係，佢嫁到富二代老公，生活無憂。而且，雖然話做咗幸福師奶，但因為佢有做運動嘅習慣，佢話𠵱家體重仲輕過未生仔之前，真係令人羡慕不已。

生完仔想追個女

過去一段時間，佢間唔中會接拍廣告保持曝光率。佢今次主持嘅網上短片，算係佢全職湊仔後首次現身螢幕，主要講BB健康問題。
珠珠噚日出席宣傳活動時話，雖然曾經因為阿仔嘔奶同爆喊，不知所措，要不斷向身邊朋友求救，但現時已經應付自如，亦都唔會做怪獸家長。所以佢有時覺得，自己其實係時候重投職場，只要遇到啱嘅機會，無論公仔箱抑或財金界，佢都有興趣試，佢老公亦好支持佢咁話。
不過講係咁講，珠珠噚日跟一名15個月大嘅廣告BB女玩嘅時候，母愛大爆發，又話自己都心郁郁想追個女。咁重投職場與追個女之間，應該點取捨好呢？佢就話「好工同BB都唔係話有就有，所以都係交由緣份決定」喎！

李華華
mailto:[email protected]