立法會上星期因為唔夠法定人數而流會，噚晚又險告出事。話說李卓人發言質疑兩電冇提名自由黨區選對手，所以自由黨對有關兩電嘅嘢可能冇咁「睇緊啲」，自由黨周梁淑怡聽到即時扯火，投訴李卓人言論冒犯該黨，要求主席范太指示阿人收回言論。

范太宣佈休會考慮，復會時循例點法定人數，點知又掹掹緊唔多夠，各黨即時急call議員歸位，其中民建聯陳鑑林本來出席nowTV直播節目，都要即撇返立法會。范太最後裁定阿人冇事。
上星期鬧出流會笑話，議員要面懵道歉，所以各黨派一早「吹雞」指令議員噚日唔好立亂行開，朝早開會時民建聯同公民黨最齊人，自由黨大部份人現身，民主黨就人腳最單薄，不過都夠法定人數，自由黨梁君彥提出個會展業動議無驚無險通過。
梁君彥似乎唔係好介意議員失場搞到流會，仲話若非流會，議員噚日唔會咁齊人投票，更加唔會有唐英年同馬時亨兩位司局長在場聽佢陳詞。既然係咁，八方認為佢第一個要多謝何俊仁。