早前講過新開台嘅ViuTV搞咗個女子MMA真人騷，搵咗8位來自娛樂、運動等唔同界別嘅女仔參加。

聽聞首兩輪比賽上兩星期已經打咗，「晶女郎」唐紫睿（Hazel）分別對戰咗郭思琳同龍小菌，前女子組合HotCha成員之一嘅黎美言（Winkie）就同鄧穎芝對賽咗，班女仔事前已經講到明大家嚟唔係做朋友，所以事前簽晒生死狀。

經過幾輪對打已經有初步結果，鄧穎芝K.O咗Winkie，而最勢均力敵嘅一場就係龍小菌對Hazel嘅對戰。龍小菌勝喺體重佔優同夠粗壯，擺明好捱得打，而Hazel優勢手長腳長加上輕盈，兩個人要打到差不多最後一roundHazel先至可以慘勝。

相對第二場Hazel同模特兒出身嘅郭思琳對戰，Hazel好輕易咁就K.O咗對手。噚日Hazel接受電話訪問時話大髀喺踢傷，佢話：「手就喺練拳時已經傷加上冇休息同對賽，o依家係傷上加傷。塊面喺第一場比賽時對手指甲劃傷，MMA拳套露指同埋第一場大家都緊張，多亂拳都擔心破相。」佢話o依家比賽已經進行咗一半，希望可以快啲捱埋落去，但就冇後悔過參賽。