港股前日創收市新高，並首次升破19000關，昨日好友梗係唔會放軟手腳，恒指裂口開出，一度升上19237全日高位，不過，升勢被沽盤窒住，國壽（2628）突然停牌，令股市冒起「批股疑雲」，各內地銀行股同保險股快速回落，打擊咗股民嘅信心，恒指其後轉為拉鋸，不過，最終都升咗61點收市。
除咗國壽停牌之外，滙控（005）繼續受壓亦影響咗投資信心，好彩隻中移動（941）仍然好勁，緩和咗市場的負面情緒，恒指仲有61點升幅，都係靠佢。中移動昨收69.40元，距離70元非常之近，睇嚟隨時會向上突破。中移動C輪3496昨日升上1.08元，全日企得好硬淨，正股破關而上，跟風炒作嘅盤應該會大增。
個市或者要唞一兩日先再炒上，好可能變成橫行格局，向上試關抑或下試支持位，就要睇兩大成份股幾時轉同一個方向郁動，現階段，炒個別係主要嘅策略，而所謂「個別者」，即強勢股份。

富士康C輪1325：富士康（2038）昨收27.10元，股價喺過去1個禮拜雖然偏淡，跌穿咗10日同20日線，仲跌穿埋條上升支持軌，點知昨日突然耍出回馬槍，掉頭升番上10日同20日線上面，成個勢即時轉好，大家如果有留意，應該都知道呢一招係富士康慣用嘅伎倆，掉頭之後，就係炒上，破咗27.50元之後，就會推向30元，富士康近排係相對落後嘅股份，破咗30元起碼睇33元。
富士康C輪1325昨收42仙，槓桿率6.5倍（有效4.8倍），對沖值0.74，正股升上30元同33元，1325應該會喺60仙同90仙樓上，現價買，正股跌穿26元止蝕。
俊　樺