【自嘲救人】上載90年世盃出迎失誤照 「狂人」希基達：唔想學我就唔好出街
蘋果日報 2020/03/21 01:00
世界盃哥倫比亞希基達武漢肺炎
希基達用自己90年世盃出醜照片告誡大家唔好出街。
近期武漢肺炎於全球各地大規模爆發，各國政府防止疫情加劇，就提出封關、鎖國，同要求國民留喺屋企避免傳播病毒。而哥倫比亞嘅傳奇門將，外號「狂人」嘅希基達就喺自己Twitter上載90年世界盃迎關出迎畀米拿偷甩腳下球嘅照片，用自嘲嚟告誡大家唔好再亂出街。
有返咁上下波齡嘅球迷都會記得希基達喺邊個，當年對英格蘭嘅友賽一記「歇子尾」喺白界前救波嘅神技，都家下都不時會流傳。但呢位狂人門將嘅職業生涯污點，就一定喺90年意大利世界盃16強對喀麥隆一戰，加時階段希基達一次出迎，就畀喀麥隆嘅38歲老將前鋒米拿搶走腳下球，之後射入空門，最終哥倫比亞就以1:2不敵喀麥隆出局，以呢記失誤都成為咗世盃其中一幕經典。
時隔差唔多30年，希基達最近就上載當日被米拿偷走腳下球的照片，並指「今日好多人send呢張畀我睇，如果呢張相可以令大家唔出街，大家就share出去喇！唔想好似我咁，就記得唔好亂出街喇。」