噚日傳出身兼中央港澳工作協調小組組長嘅國務院副總理韓正今日到粵港澳大灣區視察，最快下月初公布規劃內容後，有親中團體今日喺30幾度酷熱天氣警告下，喺露天嘅中環遮打花園搞咗個「尋找家鄉的商機－大灣區青年千人考察團體」活動，唔少大陸省巿嘅考察團都有出席。

典禮開始前，有工作人員話因為開遮對台上嘉賓「唔禮貌、影相唔好睇」，勒令在場人士收遮，但由於實在太熱，唔少參加者公然「抗命」，全程開遮擋太陽；部分考察團成員更喺活動進行其間「消失」，丟低橫額喺地搵地方避暑。有小朋友就頂唔順中暑，要喺救傷站接受治療。

台上主禮嘉賓雖然全程有頂遮陰，但部分亦頂唔順，全程「廢青扇」不離手。但講到最有「誠意」，肯定係近日率先尋找「傷」機、戴上腳托出席撐場嘅政務司司長張建宗。主辦活動嘅廣東社團總會主席梁亮勝台上話，對於張建宗帶傷出席表示感動，小肥張致辭時就用一向麻麻嘅普通話話：「這個活動是十分重要的，我不能不來的！」自爆因為「過度運動」拉傷隻腳，仲因此悟出大道理：「所以做乜嘢都唔好過份，要中庸之道啊」，發言時仲有幾聲咳，似乎身體唔多妥。

會後被問到因乜運動受傷時？小肥張相當「口密」，只係話：「乜嘢都做啊，過份（運動）啊」。據八方了解，佢係因為喺屋企附近行山時「太chur」整親小腿。