港姐冠軍雷莊𠒇當選唔夠一個禮拜，被網民狂插，更有網民掟出大堆代表澳門參選國際小姐嘅麥嘉欣（Sofia Paiva）靚相，感歎一海之隔嘅「澳門小姐」靚到暈，葡萄聲音不絕，而另一個代表香港區出戰嘅王詠珩（Wing）亦被讚外貌似麥明詩，佢喺英國讀傳理系畢業，被讚智慧與美貌並重。Sofia同Wing短短幾日成為網民心中嘅選美靚女，今日佢哋齊戴上代表澳門、香港兩地彩帶同后冠接受本報獨家專訪，暢談佢哋選美之路。

20出頭嘅麥嘉欣，遺傳爹哋同媽咪嘅中葡優良血統，6歲就做過模特兒影相，樣子甜美，更講到一口流利廣東話，原來佢係出自選美世家，皆因媽咪同阿姨都參加過澳門小姐：「自己比較細膽、缺乏自信嘅女仔，今次藉住咁國際、咁大舞台，增強自信心，同埋我媽媽、阿姨都係選美出身，都想體驗下佢哋經驗，媽咪同阿姨都係參加澳門小姐，媽咪係90年，阿姨係92年，媽咪當時攞殿軍，阿姨係亞軍，佢哋有啟發我，佢哋話都好好玩嘅，成個過程學到好多嘢，全部佳麗一齊，係你一世都記得嘅經歷。」

至於王詠珩，兩年前喺英國University of Sussex畢業，之後返嚟做模特兒，佢身邊都有唔少港姐朋友，好似張寶兒同張寶欣兩姊妹就係佢朋友，講到點解會參加國際小姐代表而唔參加香港小姐，佢就話：「國際小姐始終體驗唔同啲，參賽者係來自世界各地，佢哋culture，交流係會唔同啲，我之前有問過佢哋，估唔到佢哋會參選，覺得佢哋好犀利，會參選，我可能係比較怯嘅人嚟，所以佢哋好勁，有自信去參加呢樣嘢。」

講到選美史，二人都直言細細個就睇香港小姐大，歷年咁多冠軍佳麗，麥嘉欣笑言同佢一樣叫「嘉欣」嘅李嘉欣係佢偶像：「香港小姐都好多個好成功同好鍾意，但李嘉欣同我一樣叫嘉欣，係其中一個好鍾意，靚啦，叻啦，同埋多謝嫲嫲幫我改咗嘉欣呢個名，嫲嫲係中國人，大家叫嘉欣都好靚女。」

自從網友狂推麥嘉欣，大讚佢係靚到暈嘅「澳門小姐」，令到佢知名度狂升，佢嘅IG人數已兩日間升咗一倍，佢笑言喺澳門、香港出到街有人認得，甚至買嘢都會畀折頭。此消彼長，嘉欣BB嬴盡民間口碑，而雷莊𠒇負評依然絡繹不絕，佢都感受到對方壓力：「我覺得相信壓力一定會好大，咁多人去評論一件事，每個人都有自己長處，佢生得好高，經歷好多，讀書各樣方面都畀我豐富啲，其實佢要堅強啲，被人話都會有啲唔開心，但係我覺得唔緊要。如果發生喺自己身上，都會好大壓力，希望佢身邊朋友、家人支持佢。」而王詠珩就表示：「開facebook全部人都會講，但係我覺得每一年選香港小姐出嚟經歷好似，個個開始都有負評，選完一個階段去學習，睇得出佢自信心好好，睇得出佢識得欣賞自己，當然人哋畀評語，適當地要接納、改善吓。」

選美往往都係入演藝圈捷徑，麥嘉欣o依家喺澳門嘅聖若瑟大學讀緊第二年，佢就話希望畢業後做心理醫生，但對演藝圈都想嘗試，而王詠珩就讀完傳理系後，認清自己想做一啲關於小朋友行為嘅研究工作。二人都係靚女一名，不過已名花有主，不時在IG開心share拍拖相放閃，愛得大方，嘉欣就話：「我覺得順其自然，唔使太過在意人點睇，因為我哋唔會好過份，都係出街拍拖咁嘅日子，都想同人分享我哋開心。」而王詠珩就話自己比較鍾意坦蕩蕩，做模特兒工作雖有人叫佢post少一點拍拖生活，但佢認為拍拖生活係佢生活一部份，冇須要特別隱瞞，就算佢o依家參加選美，男友都會畀意見支持佢。