呢個政府有幾咁雙重標準？睇下佢哋對待黃色同藍色陣營嘅手法，就有答案。

有地區人士報料，建制派立法會議員何君堯今日（23日）同佢唔少「戰狼」團隊，喺美孚新邨葵涌道天橋底（萬事達廣場對出﹚聚集，原來係向市民大派口罩、搭單送埋建制喉舌《堅周刊》。現場所見，唔少街坊大排長龍，視力正常嘅人，一定發現違法限聚令，之但係藍色已經儼如「免死顏色」，自然冇任何執法部門干預。4人一行去政總請願都會收限聚令嘅民主派政團，點會有呢種「禮遇」？

何君堯佢哋邊聚眾派口罩、邊籲全民強制檢測，又促政府推動禁足令同健康碼，而最實際目的，似乎都係意在批評區議會不作為。咁梗係啦，佢哋點會願意接受，區會由民主派主導？

佢哋今日仲有位特別嘉賓，就係被裁定非妥為當選而被DQ嘅九西建制派女將陳凱欣。唔知曾做食衞局政助嘅佢，覺唔覺得現場咁多人聚集，政府部門應一視同仁咁執法，減低病毒傳播風險？

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！